Արգենտինայի կառավարությունը կրկին հայտնվել է դեֆոլտի առաջ

Արգենտինայի դեֆոլտը պաշտոնապես ուժի մեջ է մտել Նյու Յորքի ժամանակով 17:00-ին (Երևանի ժամանակով կեսգիշերին): Երկիրը չի վճարել 503 միլիոն դոլար կազմող կուպոնային վճարումները՝ Նյու Յորք նահանգի օրենսդրությամբ թողարկված դոլարային պարտատոմսերի երեք թողարկման համար: Այս պարտատոմսերը պետք է մարվեն 2021, 2026 և 2046 թվականներին: Այս վճարումները պետք է իրականացվեին ապրիլի 22-ից, սակայն Արգենտինան պաշտոնապես ունի 30 օր մուծումն իրականացնելու համար, որպեսզի խուսափի դեֆոլտից: Այս ժամանակահատվածում Արգենտինայի կառավարությունը հույս ուներ համաձայնեցնել պարտատերերի հետ իր արտաքին պարտքի վերակառուցումը, որը կկազմեր 65 միլիարդ դոլար: Սակայն հիմա չի հաջողվել իրականացնել այն, և նախօրեին կառավարությունը երկարաձգել է այս գործընթացը մինչև հունիսի 2-ը: Արգենտինան մտադիր չէ վճարել այնքան ժամանակ, քանի դեռ ձեռք չեն բերվել նոր պայմանավորվածություններ: