ԵՄ-ը սպառնում է ԱՄՆ-ին` 35 միլիարդ եվրոյի մաքսատուրքերով

Եվրոմիությունը մշակել է փաստաթուղթ, որը նախատեսում է որպես հակազդեցություն կիրառել ԱՄՆ-ի դեմ, եթե Վաշինգտոնը ԵՄ տարածքում արտադրվող մեքենաների մաքսատուրք կիրառի։ Առևտրի գծով հանձնակատար Սեսիլիա Մալմստրոմը նշել է, որ այս լրացուցիչ մաքսատուրքի դեպքում ամերիկյան տարբեր ապրանքների վրա կկիրառվի 35 մլրդ եվրոյի չափով (39.1 մլրդ դոլար) մաքսատուրք, հաղորդում է Reuters գործակալությունը:
«Մենք չենք հանդուրժի որևէ քվոտա ու սահմանափակում: Եթե մաքսատուրքը վերջ ի վերջո կիրառվի, ապա մենք կկիրառենք պատասխան ցուցակը»,- նշել է Մալմստրոմը:
Միևնույն ժամանակ, եվրոհանձնակատարը հույս է հայտնել, որ Բրյուսելը ստիպված չի լինի դիմել այդ քայլին:
Այս տարվա մայիսին ԱՄՆ նախագահ Դոնալդ Թրամփը հայտարարել էր, որ եվրոպական մի շարք արտադրողների արտադրանքներ սպառնալիք են հանդիսանում ամերիկյան տնտեսական շահերին: Սակայն, նա վեց ամսով հետաձգել էր լրացուցիչ մաքսատուրքի կիրառումը՝ պայմանավորվելով բանակցություններ վարել Եվրոմիության ու Ճապոնիայի հետ:
Մալմստրոմը Թրամփի որոշումը ողջունել էր, սակայն ԱՄՆ-ին սպառնալիքներն ու դիրքորոշումն «անհեթեթ» անվանել: