«Իհարկե, դիտավորյալ բաց եք թողել այդ հատվածը». Լենա Նազարյանը` Արմեն Աշոտյանին

ՀՀԿ փոխնախագահ Արմեն Աշոտյանը ֆեյսբուքյան իր էջում գրել է. «Այսօր ԱԺ-ում, ճեպազրույցների ընթացքում, Լենա Նազարյանն ասել է, որ եթե իշխանությունները ցանկանային, ապա ՏԻՄ ընտրություններին բոլոր 24 համայնքներում կհաղթեին իր թեկնածուները: Իրականում ՏԻՄ ընտրություններին իշխանության թեկնածուները պարբերաբար պարտվել են նաև նախկինում: Սա չէ հարցը: Հարցը նա է, որ տիկին Նազարյանը բարձրաձայն խոստովանում է, որ որևէ ընտրություններին հաղթելու համար կարևորը ոչ թե ժողովրդի ցանկություններն են, այլ իրենց իշխանության որոշումը ամեն գնով անցկացնել թե չանցկացնել սեփական թեկնածուներին: Հետաքրքիր է՝ եթե Նիկոլ Փաշինայնը որոշեր, որ պիտի իր թեկնածուները հաղթեն, ապա ի՞նչ կերպով և մեթոդաբանությամբ կապահովեր այդ հաղթանակը: Ասեմ՝ այնպես, ինչպես խորհրդարանական ընտրություններին ապաահովեցին իրենց անհայտ և անկենսագրություն բազմաթիվ թեկնածուների աստղաաբաշխական թվերը, գործածելով վարչական ողջ ռեսուրսը և հակաքարոզչությունը, գործի դնելով տեղեկատվական տեռորի իրենց սիրած գործիքակազմը ճիշտ այնպես, ինչպես արեցին հանրապետականների հանդեպ պառլամենտական ընտրություններին: Իսկ հիմա էլ ակնկալում են, որ հասարակությունը պիտի շնորհակա՞լ լինի իրենց, որ գոնե համայնքներում Փաշինյանի հերթական «կեպիներն ու սելֆիի ձողիկներին» չեն կարգել ղեկավարներ: Ընդունեք տիկին Նազարյանի այս ինքնախոստովանությունը»:

Վերջինի գրառմանն արձագանքել է ԱԺ «Իմ քայլը» խմբակցության ղեկավար Լենա Նազարյանը. «Ահա վառ օրինակ, թե ինչպես է մի բառի փոփոխությամբ փոխվում ասվածի իմաստը, իսկ իմաստների ու մտքերի նենգափոխումների որոշ վարպետ գործիչներ դրա հիման վրա մոլորեցնող ենթադրություններ են անում: Այսօր՝ ճեպազրուցյի ժամանակ, ասել եմ, որ եթե անցած ՏԻՄ ընտրություններում ՔՊ-ն առաջադրեր թեկնածուներ, ՀԱՎԱՆԱԲԱՐ, հաջողություն կգրանցեր: Երևի նորմալ է չէ՞ որ ես հավատում եմ իմ քաղաքական թիմի հավանական հաջողությանը: Եթե հանում ենք ՀԱՎԱՆԱԲԱՐ բառը ստացվում է, որ ոչ թե ընտրողն է որոշում ընտրությունների ելքը, այլ կուսկացությունը վստահ է, որ կհաղթի ու այստեղ, իհարկե, արդեն տարբեր մեկնաբանությունների տեղ է առաջանում: Բացի այդ, ասել եմ, որ ՔՊ-ն չի՛ առաջադրել թեկնածուներ (բոլոր 7 ՔՊ թեկնածուներն ինքնառաջադրվել են), քանի որ չի ցանկանում մոնոպոլիզացնել քաղաքական դաշտը»: