«Չեմ հասկանում Զվարթնոց օդանավակայանը Ազնավուրի անունով վերանվանելու առաջարկի իմաստը». Կարինե Հարությունյան

Լրագրող Կարինե Հարությունյանը ֆեյսբուքյան իր էջում գրում է. «Չեմ հասկանում Զվարթնոց օդանավակայանը Ազնավուրի անունով վերանվանելու առաջարկի իմաստը: Երեւանի օդանավակայանը բացվել է 1961-ին, այսինքն՝ 57 տարի այն Զվարթնոց տաճարի անունով է գործում, մի կոթողի, որը յոթերորդ դարի մեր հրաշագեղ գոհարներից է եղել ու որից միայն փշրանքներ են մեզ հասել: Էլ չեմ ասում՝ Զվարթնոց անունը կարեւոր է նաեւ տուրիզմի զարգացման առումով:
Ամենեւին չնսեմացնելով Շառլ Ազնավուրի մեծապատիվ անունը կարեւորելու տարբեր մարդկանց ձգտումը, կուզենայի, որ հին հայկական վատ ավանդույթով չառաջնորդվեն՝ հնի վրա նորը կառուցելով: Գուցե փոխարենը Գյումրիի օդանավակայա՞նը վերանվանենք: Դա եւ՛ կբարձրացնի այդ օդանավակայանի անունն ու նշանակությունը, եւ՛ հետաքրքրություն կառաջացնի Գյումրիի նկատմամբ, եւ՛ արժանի հատուցում կլինի Շառլ Ազնավուրին՝ գյումրեցիների կողմից: Չէ՞ որ նա քիչ բան չի արել Գյումրիի համար»: