Այսօր Վանուշ Խանամիրյանի հիշատակի օրն է. պարարվեստի լեգենդը կդառնար 91 տարեկան

ՀԽՍՀ ժողովրդական արտիստ, հայ նշանավոր պարուսույց, հայկական պարարվեստի մեծագույն երախտավորներից մեկը՝ Վանուշ Խանամիրյանը, ծնվել է 1927թ-ին՝ Երևանում: Այսօր հայ բեմի նշանավոր ներկայացուցչի հիշատակի օրն է. 2011թ-ի հոկտեմբերի 5-ին մեծ արվեստագետը հեռացավ կյանքից:

Երևանի պարարվեստի ուսումնարանի սանն իր առաջին գլխավոր դերը կատարել է «Վալպուրգյան գիշեր» բեմադրության մեջ։ 1968-1992 թվականներին ղեկավարել է Հայաստանի պարի պետական անսամբլը։ Բեմադրել է տասնյակների հասնող ներկայացումներ՝ «Գայանե», «Բախչիսարայի շատրվանները», «Սպարտակ», «Էնզելի», «Կակաչներ», ազգագրական պարերի շարք և այլն: 2000թ-ից հիմնադրել և ղեկավարել է Հայաստանի Պարարվեստի գործիչների միությունը, որը 2009թ-ից կրում է իր անունը։ 2004թ-ին ստեղծել է վետերան-պարուսույցների «Վանուշ» պարախումբը, 2010 թվականին՝ «Բարդիներ» պարախումբը: