Ասլամազյան քույրերի աշխատանքների բացառիկ նմուշները՝ Գյումրու պատկերասրահում

Գյումրու կենտրոնական հրապարակին կից Աբովյան փողոցում գտնվում է Ասլամազյան քույրերի պատկերասրահը: Պատկերասրահը բացվել է 1987-ին, այն կառուցվել է 1980-ական թվականներին՝ որպես ուսումնական հաստատություն։

Պատկերասրահի շենքը երկրաշարժից հետո մասամբ վնասվել է, իսկ կանգուն մնացած հատվածը տրամադրվել է անօթևաններին։ 2004 թվականին վերակառուցվել է Լինսի հիմնադրամի միջոցներով:

«Գյումրու Ասլամազյան քույրերի պատկերասրահում ցուցադրում և պահպանում ենք Ասլամազյան քույրերի ամենամեծ հավաքածուն»,- MAMUL.am-ի թղթակցի հետ զրույցում ներկայացրեց պատկերասրահի տնօրեն Վահագն Ղուկասյանը:

Պատկերասրահի առաջին հարկում ցուցադրվում են ՀԽՍՀ ժողովրդական նկարչուհի Մարիամ Ասլամազյանի նկարները (գեղանկար, գրաֆիկա), նկարազարդ թասեր, սպասք, մոմակալներ։

Երկրորդ հարկում՝ ՀԽՍՀ վաստակավոր նկարչուհի Երանուհի Ասլամազյանի գործերը:

Վ. Ղուկասյանը տեղեկացրեց, որ օգոստոսի 18-ին առաջին անգամ կարողացել են պատկերասրահից մեծ քանկով գործեր դուրս տանել և Մոսկվայում նշել Մարիամ Ասլամազյանի 110-ամյակը:

«Մյուս քույրիկը՝ Երանուհի Ասլամազյանը, համարվում է աշխարհում ամենահայտնի խեցեգործը՝ ունենալով 110 կտոր խեցեգործ աշխատանք, որի ամենամեծ մասը Գյումրու պատկերասրահում է ցուցադրվում»,- ասաց Վ. Ղուկասյանը՝ հավելելով, որ աշխատանքներից ամենալավերը Ե. Ասլամազյանը 1987-ին նվիրել է այս պատկերասրահին:

Մեր զրուցակցի խոսքով՝ «Իմ Հայաստան» ծրագրի հետ միասին փորձում են խեցեգործությունը ճանաչելի դարձնել ոչ միան Հայաստանում, այլև Հայաստանից դուրս, ինչպես նաև զարգացնել արվեստի այս ճյուղը: «Ցավոք սրտի, Հայաստանում մշակույթի այս ճյուղը զարգացած չէ, կամ եթե զարգացած էլ է, ապա մեծ ֆինանսների հետ է կապված, ինչը դարձյալ խնդիրներ է ստեղծում»,- ասում է Վահագն Ղուկասյանը:

Պատկերասրահը, որպես գեղարվեստական թանգարան, պահպանում և ցուցադրում է Ասլամազյան քույրերի գեղանկարչական, գրաֆիկական և խեցեգործական աշխատանքների մոտ 620 բնօրինակ (ցուցանմուշները՝ մոտ 619 կտավ, դեկորատիվ-կիրառական արվեստի առարկաներ):