Բարեգործական ցուցահանդես՝ «Հին Երևան»

Սեպտեմբերի 13-ին՝ 14:00-ին, Ժողովրդական արվեստի կենտրոնում կբացվի գեղանկարիչներ Գրիգոր Աղասյանի (1926-2009) և Վարդիթեր Կարապետյանի (1927-2014) ստեղծագործությունների ցուցահանդեսը՝ «Հին Երևան» խորագրով:
Մուտքի արժեքը 1000 դրամ է. ողջ հասույթը տրամադրվելու է Շիրակի երկրագիտական թանգարանի շենքի նորոգմանը:

Ցուցահանդեսը բաց կլինի մինչև սեպտեմբերի 23-ը:

Հովհաննես Շարամբեյանի անվան Ժողովրդական արվեստի կենտրոնը ազգային մշակույթի այն եզակի օջախներից է, որի առաքելությունն է նյութական և ոչ նյութական մշակութային ժառանգության արժեքների պահպանումը, շարունակականության ապահովումն ու հանրահռչակումը:

Կենտրոնի Երևանի և Դիլիջանի ժողովրդական արվեստի թանգարանների հիմքը կազմում են 1930-ական թվականներին ազգագրագետ, բանահավաք Հաբեթնակ Բաբայանի ջանքերով հիմնադրված Ժողովրդական ստեղծագործության տան ցուցանմուշները: Հավաքածուն (շուրջ 10.000 նմուշ) ընդգրկում է փայտի, մետաղի և քարի գեղարվեստական մշակման, ասեղնագործության, գորգագործության, խեցեգործության նմուշներ, ինչպես նաև ինքնուս նկարիչների գեղանկարներ: Հավաքածուում առանձնակի տեղ են գրավում սփյուռքահայերի նվիրատվությունները:

Ժողովրդական վարպետների ստեղծագործությունները յուրատիպ մշակութային արժեքներ են, որոնք ներկայացնում են Հայաստանի պատմա-ազգագրական գրեթե բոլոր շրջանների ժողովրդական արվեստն ու նրա զարգացման փուլերը:

Կենտրոնում տեղի են ունենում դասընթացներ, ժամանակավոր ցուցահանդեսներ, գրքի շնորհանդեսներ և բազմաթիվ այլ մշակութային միջոցառումներ: