Ազգային ազատագրական պայքարով ոգեշնչված՝ 130 տարի առաջ հայ արծաթագործը պատրաստել է կանացի գոտի՝ փամփուշտների տեսքով (լուսանկար)

Ֆրանսաբնակ Համլետ Հովսեփյանը հայ մշակույթի նմուշների իր հավաքածուն համալրել է յուրահատուկ արծաթե գոտիով. «1890 թվին արևմտյան Հայաստանում սկիզբ առած ազգային ազատագրական պայքարով ոգեշնչված՝ Սեբաստացի հայ արծաթագործ վարպետի պատրաստած կանացի արծաթե գոտին՝ փամփուշտների տեսքով։ Վարպետը գոտու վրա Մաշտոցյան գրերով թողել է իր անվան և ազգանվան առաջին տառերը «ՅՉ», ինչպես նաև՝ օսմաներենով «Սիվաս (Սեբաստիա)» և «90»:
Չափերը՝ 89×3.1սմ, քաշը՝ 409.6 գրամ..»,- զարդի մասին պատմել է Համլետ Հովսեփյանը:

MAMUL.am-ի թղթակցի հետ զրույցում նա նաև նշեց, որ այս գոտին մի քանի այլ գոտիների հետ իրեն է ուղարկել ստամբուլաբնակ մի հնավաճառ: «Նա ինձ գոտու այս նկարն ուղարկեց, և մեջս մեծ կասկած առաջացավ, որ մեջտեղի տողում հայերեն տառեր են:

Գոտին գնելուց հետո այն ցույց տվեցի մասնագետների և պարզեցի, որ այն պատրաստել են Սեբաստիայի հայ վարպետները: Սեբաստիայից շատ քիչ զարդեր են մեզ հասել, ի տարբերություն Վանի»,- պատմեց Համլետ Հովսեփյանը: