«Կոմիտասի թանգարանում Կոմիտաս երգելն աննկարագրելի զգացողություն է». Մասիս Առաքելյան

Սայաթ-Նովայից Արամ Խաչատրյան, Կոմիտասից Շուման՝ գերմանաբնակ Մասիս Առաքելյանի երգացանկը հարուստ է հայ ու գերմանական դասական ստեղծագործություններով: Նման հագեցած ծրագրով էլ Մասիս Առաքելյանը հունիսի 10-ին ելույթ ունեցավ Կոմիտասի թանգարան-ինստիտուտում:

«Երևանում համերգներ ունեցել էի, բայց սա առաջին մեծ մենահամերգն էր, և ինձ համար խոհրդանշանական էր ելույթ ունենալ Կոմիտասի թանգարանում ու նաև Կոմիտասի երգերից կատարել. դա աննկարագրելի զգացողություն էր», - ասում է տենոր, կոմպոզիտոր Մասիս Առաքելյանն ու հավելում, որ Հայաստանում համերգ ունենալու գաղափարը պատահական է ծնվել.

«Հայրենիք վերադարձա մայիսի 28-ի՝ Առաջին հանրապետության 100-ամյակի տոնակատարությունների առթիվ: Ընկերներս առաջարկեցին նաև համերգով հանդես գալ ու հենց նրանք խորհուրդ տվեցին այն կազմակերպել Կոմիտասի անունը կրող այս կառույցում: Մոտ երեք շաբաթ տևեցին նախապատրասական աշխատանքները, ուրախ էի համագործակցել Հայաստանում բնակվող երաժիշտների՝ դաշնակահար Մարինա Վարդանյանի, ջութակահար Շուշան Հակոբյանի և թավջութակահար Գոռ Մանթաշյանի հետ»:
Կոմիտասի, Արամ Խաչատրյանի, ինչպես նաև իր հեղինակային ստեղծագործությունները աշխարհի տարբեր երկրներում կատարելուց հետո կոմպոզիտորը վստահեցնում է՝ հայկական երաժշտություն հուզում և հետաքրքրում է արտասահմանցի հանդիսատեսին.
«Նրանք մեծ հետաքրքրությամբ են լսում հայկական ստեղծագործությունները, սակայն, իմ կարծիքով, հարկավոր է մի փոքր դուրս գալ ազգային նեղ շրջանակից: Ես ամենևին նկատի չունեմ փոխել նոտաները կամ Կոմիտասն այլ ձևով կատարել, ոչ, խոսքս մատուցման ձևի մասին է, լավագույն օրինակներից մեկը Արամ Խաչատրյանն է, ով ազգային հիմքի վրա ստեղծեց համաաշխարհային գլուխգործոցներ»:
Բեռլինում բնակվող Մասիս Առաքելյան հայաստանյան հանդիսատեսի ջերմ ընդունելությունից հետո խոստովանում է. «Արդեն մտածում եմ կրկին հայրենիք վերադառնալու և համերգային նոր ծրագրով ելույթ ունենալու մասին»: