«Աշխատանքիս ամենամեծ գնահատականը երեխաների՝ ուրախությունից փայլող աչիկներն են». տիկնիկագործ Մերի Առաքելյանն ու նրա կերպարային տիկնիկները

Տիկնիկագործ Մերի Առաքելյանը հեքիաթի մի շող է բերում մեր իրականություն: Երևանցի Մերին ամուսնացել է արցախցու հետ և այժմ ապրում ու ստեղծագործում է Ստեփանակերտում: MAMUL.am-ի հետ զրույցում նա պատմում է. «Իմ բոլոր խաղալիքները և տիկնիկները գործում եմ ես: Մեկ տարուց ավելի է, ինչ սկսել եմ զբաղվել տիկնիկագործությամբ: Ամեն ինչ սկսվեց նրանից, որ աղջիկս խնդրեց իր համար գործել իր սիրած կինոհերոսուհուն: Գործեցի, առաջին անգամի համար բավականին հաջող ստացվեց ու սկսեցի ավելի խորանալ արվեստի այդ տեսակի մեջ:

Հելունով կամ շյուղերով փոքրիկ խաղալիքներ գործելը ճապոնական արվեստի տեսակ է, որը կոչվում է ամիգուրումի: Այսօր ամբողջ աշխարհում տիկնիկագործությունն ամենատարածված ու սիրված արվեստներից մեկն է:

Մերիի տիկնիկները հիմնականում կերպարային են:

«Սկզբից մարդիկ մի տեսակ անվստահությամբ էին վերաբերվում այն փաստին, որ տիկնիկները կարող են լինել կերպարային: Բայց մեկ-երկու կերպարային տիկնիկ տեսնելուց հետո արդեն շատերն սկսեցին հետաքրքրվել դրանցով: Կերպարային տիկնիկը ոչ միայն կարող է լավ խաղալիք հանդիսանալ, այլ նաև դառնալ հուշանվեր և բարի հիշողություն ապագայի համար:

Այսօր ես պատվերներ եմ ստանում ոչ միայն Հայաստանից (Հայաստան ասելով՝ նկատի ունեմ իհարկե նաև Արցախը), այլ նաև արտասահմանանից՝ ԱՄՆ-ից, Եվրոպայից (Պորտուգալիա, Հյուսիսային Իռլանդիա, Լեհաստան) և ՌԴ-ից: Օրինակ, մի ամերիկուհի պատվիրատու ունեի, ով իր թոռնիկի համար տիկնիկ պատվիրեց, ստանալուց հետո այնքան էր հավանել, որ իր երկու մյուս թոռնիկների համար էլ պատվիրեց:

Կերպարային տիկնիկ պատրաստելիս պետք է ոչ միայն ստանալ երեխայի կամ մեծահասակի արտաքին նմանությունն, այլև կարողանալ փոխանցել նրա բնավորությունը, տրամադրությունն, զգացմունքները: Եթե այդ ամենն ստացվում է, տիկնիկը կյանք է ստանում: Ինձ գրեթե բոլորն ասում են, որ իմ տիկնիկները կարծես կենդանի լինեն, կարծես խոսում են քեզ հետ»:

MARY Fancy Crafts-ի տիկնիկներն ամբողջովին հավաքված են մետաղական կոնստրուկցիայի վրա, ինչի շնորհիվ նրանց ձեռքերը, ոտքերը ծալվում են, մարմինն ամբողջությամբ շարժական է:

Տիկնիկները գործված են 100 տոկոսանոց բամբակյա թելերով, իսկ հագուստը՝ բամբակից կամ մանկական ակրիլից:

Խաղալիքներն ամբողջովին հակաալերգիկ են:

Մեկ տիկնիկ պատրաստելը տևում է 5-7 օր՝ կախված բարդությունից, հագուստի քանակից:

«Ֆինանսական առումից զատ ամենամեծ գնահատականն աշխատանքիդ, իհարկե, երեխաների՝ ուրախությունից փայլող աչիկներն են: Գիտեք, գրեթե, բոլոր իմ պատվիրատուները հետո ինձ գրում են ու պատմում, թե ինչպես իրենց երեխաներն օրերով չեն բաժանվում իրենց տիկնիկներից, գիշերները վերցնում են իրենց հետ քնելու, անգամ մանկապարտեզ են տանում իրենց հետ: Այնքան են կապվում, որ մեկ րոպե անգամ չեն կարողանում բաժանվել իրենց փոքրիկ նմանակներից: Դա իմ աշխատանքի ամենասիրելի մասն է»:

Կերպարային տիկնիկներից բացի Մերին գործում է նաև, այսպես կոչված՝ մարդուկներ տարբեր կենդանիների, մրգերի, մուլտհերոսների, մարդկանց կերպարներով: