Երևան`   +21 °C
Այսօր`   Երեքշաբթի, 16 հոկտեմբերի, 2018 թ.

Նյու Յորքի «Մետրոպոլիտեն» թանգարանում այսօր կբացվի «Հայաստան» (Armenia!) ցուցահանդեսը

140
Շաբաթ, 22 սեպտեմբերի, 2018 թ., 14:05
Նյու Յորքի «Մետրոպոլիտեն» թանգարանում այսօր կբացվի «Հայաստան» (Armenia!) ցուցահանդեսը

Աշխարհի ամենահեղինակավոր մշակութային օջախներից մեկում՝ Նյու Յորքի «Մետրոպոլիտեն» թանգարանում այսօր՝ սեպտեմբերի 22-ին կբացվի «Հայաստան» (Armenia!) ցուցահանդեսը, որը ձևավորվել է Հայաստանի պատմության, Էջմիածնի Մայր Տաճարի թանգարանների, Մատենադարանի, ինչպես նաև Սփյուռքում գործող հայկական մի շարք թանգարանների հավաքածուներից:
«Ցուցահանդեսը նվիրված է հայ ժողովրդի գեղարվեստական ու մշակութային ձեռքբերումներին համաշխարհային համատեքստում՝ քրիստոնեության ընդունումից մինչև 17-րդ դարը: Հավաքածուն ներառում է 140 թանգարանային առարկա, մեծ մասը Հայաստանից տարված ցուցանմուշներն են: Ցուցադրության համադրողն է դոկտոր Հելեն Էվանսը»,-ամերիկյան ցուցահանդեսի առաջիկա մեկնարկին նվիրված ասուլիսում տեղեկացրել էր Մշակույթի նախարար Լիլիթ Մակունցը:
Հայաստանի պատմության թանգարանը Մետրոպոլիտենում կներկայացնի 34 ցուցանմուշ, այդ թվում՝ քանդակագործության բարձրարժեք նմուշներ, կրոնական, կենցաղային առարկաներ և այլն: Տնօրեն Գրիգոր Գրիգորյանի բնորոշմամբ՝ ցուցադրության ամբողջ ընթացքում կարմիր թելով անցնում է քրիստոնեությունը: Հայաստանը ներկայանում է իր քրիստոնեական շրջանով:
Երևանի Մաշտոցի անվան Մատենադարանի տրամադրած 28 ձեռագրերի հիմնական մասը, ինչպես տնօրեն Վահան Տեր-Ղևոնդյանն է ասել, ավետարաններ են, աստվածաշունչ գրքեր, նաև պատմական անձանց ներկայացնող ձեռագիր նմուշներ: Մատենադարանը ներկայանում է նաև հարուստ մանրանկարներով: «Ներկայացված են հայ գրչության բոլոր խոշոր կենտրոնները»,- վստահեցրել է Մատենադարանի տնօրենը:
«Մետրոպոլիտեն» թանգարանում «Հայաստան» (Armenia!) ցուցահանդեսը կգործի 2018 թվականի սեպտեմբերի 22-ից մինչև 2019-ի հունվարի 13-ը: