Երևան`   +14 °C
Այսօր`   Ուրբաթ, 29 մարտի, 2024 թ.

Ցմահ դատապարտյալների բաց նամակը՝ Արտակ Զեյնալյանին

425
Երկուշաբթի, 04 հունիսի, 2018 թ., 17:15
Ցմահ դատապարտյալների բաց նամակը՝ Արտակ Զեյնալյանին

Մի խումբ ցմահ դատապարտյալներ բաց նամակ են հղել ՀՀ արդարադատության նախարար Արտակ Զեյնալյանին, որը ներկայացնում ենք ստորև.

«Հարգարժան պարոն Ա․ Զեյնալյան, Դուք, այն հասարակական-քաղաքական եզակի արդարամիտ գործիչներից եք, ով ամեն պատեհ պահի՝ համաժողովներում, այցերի ժամանակ և այլն, բարձրաձայնում էիք այն խնդիրը, որ 2003թ․ օգոստոսի 1-ին ՀՀ 2-րդ նախագահ Ռ․Քոչարյանը, թույլ տալով օրենքի կոպիտ խախտում, 42 մահապատժի դատապարտյալներին շնորհեց «ներում»՝ մահապատիժը փոխարինելով ցմահ դատապարտման՝ օրենքով նախատեսված 15-20 տարվա փոխարեն։ Ուզում ենք ներկայացնել, որ այդ չարաբաստիկ «ներման» հրապարակումից հետո 42 մահապատժի ենթարկված դատապարտյալները հայտարարեցին հացադուլ, որից հետո եկան մի շարք գործիչներ, որոնք բոլորն էլ փաստում էին այդ սխալը, խոստանում բարձրաձայնել, լուծում գտնել ու հետամուտ լինել այդ սխալի շտկմանը։ ՔԿՀ է այցելել մարդու իրավունքների առաջին պաշտպան Լ․Ալավերդյանը։ Նա, տեղեկանալով խնդրին, արձանագրեց օրենքի կոպիտ խախտում։ Այնուհետև, եկավ 5 հոգուց բաղկացած պատվիրակություն՝ պետաիրավական հանձնաժողովի նախագահ Ռ․Պետրոսյանի գլխավորությամբ, ով խնդրին ծանոթանալուն պես հայտարարեց, որ Ռ․Քոչարյանի կողմից թույլ է տրվել կոպիտ խախտում և խոստացան պարզել։ Այն ժամանակվա ԱԺ նախագահ Տ․Թորոսյանը ևս ապշեց՝ ասելով, որ անպայման պարզելու է, թե ով է կազմել ու հրամցրել Ռ․ Քոչարյանին նման անմտություն։ Այնուհետև, եկավ Աղվան Հովսեփյանը՝ վարչության պետի հետ։ Նրանք, զրույցի ընթացքում քննարկեցին խնդիրը ԵԴ ուղարկելու հարցը, որն իբրև կլուծեր հարցը՝ փոխելով 15-20 տարվա ազատազրկմամբ։ ԵԽ հայաստանյան գրասենյակի ղեկավար Ն․Վուտովան, նույնպես այցի ժամանակ արձանագրեց օրենքի խախտումը և ԵԽ_ում իր տարեկան զեկույցում կոչ արեց ՀՀ կառավարությանն անհատական մոտեցում ցույց տալ 42 մահապատժի ենթարկված դատապարտյալներին՝ վերանայելով յուրաքանչյուրի գործը։ Սակայն, ՀՀ իշխանությունը թքած ունեցավ նրանց հորդորի վրա։ Երեք տարի անց միայն Ռ․Քոչարյանը դիմեց Ա․Հովսեփյանին հարցի իբր կարգավորման գործով, որն էլ իր հերթին հանձնարարեց Գ․ Ջահանգիրյանին «վերանայել» գործերը։ Վերջինս 2 օրում «վերանայեց» 42 հոգու գործ՝ հոդվածները համապատասխանաբար փոխելով նոր օրենսգրքի հոդվածներով։ Տասնյակ անգամներ հացադուլի, բողոքների, անհամար դիմումների միջոցով փորձել ենք ուշադրություն սևեռել մեզ վրա, բայց իշխանությունները որդեգրել էին չլսել-չտեսնելու քաղաքականությունը։ Արդեն վաղուց լրացել են և՛ 15, և՛ 20, և՛ ավելի տարիները։ Վաղուց ժամանակն է, որ մեզ էլ լսեն, մեզ էլ մարդ համարեն ու նվիրեն բաղձալի ազատություն։ Մեծ հույսով ու խորին հավատով ենք լցված Ձեր հանդեպ, պարոն Ա․ Զեյնալյան։ Մեր Նոր Հայաստանում պետք է տիրի օրենքն ու մարդասիրությունը՝ Ձեր անմիջական մասնակցությամբ։ Խորին հարգանքներով՝ մի խումբ ցմահ դատապարտյալներ»։