«Եթե թույլ տաք հանքերի շահագործումը, 10-20 տարի անց կարող եք մոռանալ մաքուր խմելու և ոռոգման ջրերի, հողերի ու ձեր մրգերի մասին». ՀԲՃ-ն՝ մեղրեցիներին

Սիրելի մեղրեցիներ,

Եթե դուք թույլ տաք հանքերի շահագործումը ձեր տարածաշրջանում, ապա մի 10-20 տարի անց կարող եք մոռանալ մաքուր խմելու և ոռոգման ջրերի, հողերի ու ձեր մրգերի մասին։ Մարդկանց առողջական վիճակն էլ կվատթարանա՝ ծանր մետաղների տարածման հետ միասին։ Հետևեք մյուս տարածաշրջանների բնակիչների օրինակներին և հաստատակամ ո՜չ ասեք նոր հանքերին։
Մեղրի համայնքի ավագանին թույլատրել է համայնքի ղեկավարին՝ Մեղրիի վարչական տարածքում Լիճք բնակավայրում գտնվող պղնձի գործող հանքավայրի ընդլայնման և ենթակառուցվածքների համար անհրաժեշտ հողամասեր ձեռք բերելու նպատակով, փոխհամաձայնությամբ, համարժեք փոխհատուցմամբ գնել քաղաքացիների սեփականություն հանդիսացող 148 միավոր հողամասեր:
ՀԲՃ-ն հարցում էր ուղարկել բնապահպանության նախարարին՝ պարզելու համար, թե արդյո՞ք ներկայացվել են վերոնշյալ հանքի ընդլայնման նախագծերը նախարարություն։ Պատասխանից պարզվեց հետևյալը․
«Ի պատասխան Ձեր 2018թ. փետրվարի 26-ի գրության հայտնում եմ, որ ՀՀ Սյունիքի մարզի Մեղրի համայնքի Լիճքի պղնձի հանքավայրի ընդլայնման՝ նախատեսվող գործունեության փաստաթղթերը չեն ներկայացվել ՀՀ բնապահպանության նախարարություն՝ շրջակա միջավայրի վրա ազդեցության փորձաքննության»։
Այսինքն հանքահեններն այնքան վստահ են, որ կստանան բոլոր թույլտվությունները, որ առանց դրանց սկսել են գնել գյուղացիների հողամասերը։
Սիրելի մեղրեցիներ, ոտքի կանգնեք և թույլ մի տվեք, որ ձեր հիասքանչ բնությունն ու ձեր զավակների ապագան վտանգի տակ դնեն րոպեական շահի պատճառով։